Zaand in de leerzen

Schriefster Janet Baron-Lopers is geboren in een boerengezin in de Voele Riete, een klein plekkie vlakbij het Drèentse Zuudwolde. Op heur 20e vertrök ze naor Assen um hier in de zörg te gaon warken. Het plattelaand bleef trekken en daorumme woont ze nou al jaoren op Leeghaolerveene net onder Assen. Ze schref körte verhalen in heur eigen taal; het Drèents. Heur verhalen gaot over de daaglijkse dingen in het leven. Ze bint soms grappig, soms ontroerend. Mar altied um mit een glumlach te lezen. Janet haalt inspiratie uut alles wat ze zet en heurt um heur hen. Regelmaotig publiceert ze in het blad 'Maandewark'. Ok zit ze in de schrieverskring ‘Goeie Zin’, verbunden an het Huus van de Taol en is ien van de schrievers van de verhalenbundel ‘Vörst’ (2012) uutegeven deur Het Drentse Boek. In 2014 wun ze een pries mit heur kienderverhaal ‘Joris’. Mit dizze bundel kan het briedere publiek kennis maken mit heur beeldende en inspirerende verhalen.