Plek van bestemming

Wied vot om dichterbij te kommen. Smaangs is een voettocht van neud om de kindertied of te sluten. Van Rome naor het Huus van Vader. Op de tast deur het leven. Gevuul holdt verstaand vaker as iens veur de mal. Benaom veur elk die an de reize is. Wie humzölf niet de baos kan, trekt an het körtste ende. 'Van liefde mut ik niks hebben,’ heur ik mezölf zeggen. En veur ik het weet klinkt tussen de bomen: ‘Over hoop heur ie mij niet.’ Ik loop in het Schwartzwald. Een nauw bospad in de snei. Naost mij löp een Duutser in Lederhose, lange kneikousen met de kneien bloot. Het vrös krap, en in het windstille bos is het niet kaold. In het rugzakkie heb ik hiete thee met teveul suker. Metkregen uut het pension. ‘Reden sie nicht von Liebe,’ zeg de Duutser.