Carpe Diem

Geertrui is ut pseudoniem van Gertruda (kortweg Trui),Catharina Ramakers en is gebore in Oler in 1922. In 1946 trouwdje ze mèt Curvers Harie oet Zampert. Toen de kinjer einmaol zoea groeat wore det ter Sinterklaos gedichtjes gesjreve ginge waere bleek se det woonjerwaal hieël good te kinne. Ze haaj dao ouch ein groeat plezeer aan. En zoea is ut zo’n bietje begós. Steeds dèkker waerdje ut schrift oetgehooldj en mèt ein heukig schrift ein gedicht of versje nieër gesjreve. Ouch herinneringe oet “daen aoje tied” waerdje aan ut pepeer toevertrouwdj, meistal in ut plat, sóms op rijm, mer altijd mèt plezeer. De gedichte zeen neet van ein hoeag literair nivo. Ze zeen einvoudig van opzèt en dèk geschreje in ut Olers-plat zoeas se dach det ut mós. Dus zuuver foenetisch en neet volges de regels van ut Veldeke ofzoea. Zoea zeen de klanke neet altied konsekuent gebroektj en deej se waal ins foetele mèt get weurdjes. Oet al die gedichte bliekt eine hang nao vreuger en ein rotsvast vertroewe in God. Mer ouch kós se zich verwonjere euver die klein dingskes die de minse noe zoea gewuën vinje.