سژین

جارێکیان لە سەردەمی زانکۆ پرسیارم لە هاوڕێیەکی شاعیرم کرد، ئایا لە کوردیدا هیچ وشەیەکت گوێ لێ بوووە بۆ حاڵەتێکی تایبەتی برین کە هاوکات هەم دەخورێ و هەم ژان دەکات؟ ئەو کاتەی کە ئەگەرچی ئەزانی ژان دەکات و نابێ دەستی لێ بدەی هەتا خۆی چاک بێتەوە، بەڵام هەر نینۆکی تێ ئەچەقێنی و ئەیخورێنی... چی پێ ئەڵێن؟ ئەبێ وشەیەکمان بۆی هەبێ. زۆر بەئامادەیی و بەبێ ئەوەی کە زۆر بیری لێ بکاتەوە، وەکوو بڵێی هەر لەو کاتەیا برینێکی ئاوەهای هەبێت و ساڵەهایە ئەو ناوەی لە سەر زمانە وتی: "سژین، سژین ڕاست ئەو حاڵەتەیە کە باسی ئەکەی." ئێستا من ساڵەهایە ئەو وشەیە لەو مانایەدا بەکار دەبەم، بەڵام هەرچی بۆی گەڕام نەمدیت و نەمبیست کەسێک پشتڕاستی بکاتەوە کە ئەو وشەیە بەڕاستی بەو مانایە هەیە یان نا.